17 வயது மகளை கர்ப்பமாக்கிய 31 இளைஞன் , மகளை மணம் செய்ய மறுத்ததால் கொலை செய்தேன் : குளியாப்பிட்டிய கொலை குறித்த புதிய கதை.

குளியாப்பிட்டியில் காணாமல் போன இளைஞன் கொலை செய்யப்பட்டு காட்டில் கண்டெடுக்கப்பட்ட கதை தற்போது வித்தியாசமான திருப்பத்தை எடுத்துள்ளது.

காதலியைப் பார்க்கச் சென்ற ‘அப்பாவி’ இளைஞன் கொல்லப்பட்டுள்ளதாக ஊடகங்கள் செய்தி வெளியிட்டன. ஆனால் காதலியின் தந்தையாகக் கருதப்படும் ‘சிகிந்தி’ என்ற சுஜித் பெர்னாண்டோவின் கூற்றுப்படி, இந்த கொலை தந்தையின் பாசத்தினால் நடந்ததாக புதிய கோணமாக மாறியுள்ளது.

தனது மகளுக்கு 17 வயது எனவும் தற்போது அவர் கர்ப்பமாக இருப்பதாகவும் , உயிரிழந்த 31 வயதுடைய இளைஞன் அவளை கர்ப்பமாக்கினார் என தந்தையான ‘சிகிந்தி’ பொலிஸாரிடம் தெரிவித்துள்ளார்.

முதலில், அவரைக் கொல்ல நினைக்கவில்லை , தன் மகளுக்குப் பிறக்கப் போகும் குழந்தைக்குத் தந்தை என்பதால், தன் மகளை திருமணம் செய்து வைக்க வேண்டும் என்ற நோக்கில், இது குறித்து ஆலோசிக்க அழைத்து வந்தபோது, ​​தொடர்ந்து மகளை ஏற்க மறுத்ததால், தகராறு ஏற்பட்டுள்ளது. இறுதியில் கொலையாக மாறியது என ‘சிகிந்தி’ தெரிவித்துள்ளார்.

நேற்று நீதிமன்றத்தில் ஜாமீன் இழந்து மீண்டும் ரிமாண்ட் சிறைக்கு சென்ற ‘சிகிந்தி’ யும் அவரது மனைவியும், சிறைக்கு செல்லும் வழியில் செய்தியாளர்களிடம் பேசுகையில், தங்கள் மகள் 52 முறை துஷ்பிரயோகம் செய்யப்பட்டாலும், ஊடகங்கள் ஏன் இதைப் பற்றி பேசவில்லை என கேள்வி எழுப்பியுள்ளார். இந்த பிரச்சனையால் தனது வீடு எரிக்கப்பட்டுள்ளதாகவும், தனது மகளின் நிலை குறித்து தெரிவிக்க வேண்டும் என்றும் , ஊடகங்களில் தம்மைப் பற்றி பேசுவது மட்டுமன்றி தமது பிரச்சினைகளையும் வெளியிட வேண்டும் எனவும் சிகிந்தி’ மேலும் தெரிவித்துள்ளார்.

கைது செய்யப்பட்டுள்ள சிறுமியின் மாமாவிடம் பொலிசார் நடத்திய விசாரணையில், அந்த இளைஞன் கொலைக்குக் காரணமான உண்மை குறித்து முன்னதாகவே தெரியவந்தது.

காதலியின் தந்தையான சிகிந்தி’ இளைஞனை வீட்டுக்கு அழைத்து வந்து தனது மகள் கர்ப்பமாக இருப்பது குறித்து பேசி, மகளை திருமணம் செய்து குழந்தையை பெற்றுக் கொள்ளுமாறு மிரட்டியதாகவும், ஆனால் அந்த இளைஞன் குழந்தை தன்னுடையது இல்லை என்றும் தன்னால் மகளை திருமணம் செய்ய முடியாது என கூறியதாகவும் அவர் கூறியுள்ளார்.

அதிர்ச்சியடைந்த மகளின் தந்தை, அந்த இளைஞரை கட்டி வைத்து பலமுறை அடித்ததோடு , வற்புறுத்தியும் அவர் எதற்கும் சம்மதிக்காததால், காரில் ஏற்றிச் சென்றுள்ளார். கடைசியாக இளைஞனது கழுத்தை நெரித்து கொலை செய்துள்ளார்.

குளியாபிட்டிய பிரதேசத்தைச் சேர்ந்த உயிரிழந்த இளைஞன் இறக்கும் போது 31 வயதுடையவர் எனவும், குறித்த இளைஞன் முன்னரே திருமணமானவர் எனவும், தற்போது அந்த திருமணத்தை கைவிட்டுள்ளதாகவும் தெரிவிக்கப்படுகின்றது.

அதே சமயம் இளைஞன் இன்னொரு பெண்ணுடன் தொடர்பில் இருப்பதாகவும் , அந்தப் பெண்ணும் கருவுற்ற பிறகு கருக்கலைப்பு செய்து கொண்டதாக வதந்திகள் பரவி வருகின்றன.

இதேவேளை, கொல்லப்பட்ட சுசித் ஜயவன்சவுடன் காதல் உறவில் ஈடுபட்டதாகக் கூறப்படும் 17 வயதுடைய சிறுமியும் , இரண்டு சிறிய சகோதரர்கள் குறித்தும் இதுவரை எந்த தகவலும் வெளியாகவில்லை என பொலிஸார் குறிப்பிடுகின்றனர் .