10,000 ரூபாய் சம்பளப்பணம் பாக்கி: 24 கோடி இழப்பை ஏற்படுத்திய பணியாளர்

10,000 ரூபாய் சம்பளம் தராத ஆடை தயாரிப்பு நிறுவனத்தை தீவைத்துக் கொளுத்தியுள்ளார் பணியாளர் ஒருவர்.

தான் வேலை செய்த நிறுவனத்தின் உரிமையாளர் தனக்கு சம்பளப்பணமாக வரவேண்டிய 10,000 ரூபாயைக் கொடுக்காததால், அவரை பழிவாங்க முடிவு செய்துள்ளார் பணியாளர் ஒருவர்.

சம்பளப்பணம் பாக்கி
குஜராத்திலுள்ள சூரத் நகரில் அமைந்துள்ள ஆடை தயாரிப்பு நிறுவனம் ஒன்றில் வேலை செய்துவந்துள்ளார், மஹாராஷ்ட்ரா மாநிலத்தைச் சேர்ந்த வினோத் (Vinod Salve) என்பவர்.

தனக்கு வரவேண்டிய 10,000 ரூபாயை, நிறுவன உரிமையாளர் தராததால் ஆத்திரமடைந்த வினோத், ஆடை தயாரிப்பு நிறுவனத்தை தீவைத்துக் கொளுத்தியதாக பொலிசார் தெரிவித்துள்ளார்கள்.

தன்னுடன் வேலை செய்யும் சீனியர்களும், நிறுவன உரிமையாளரும் தன்னை துன்புறுத்திவந்ததால், தனக்கு அவர்கள் மீது கோபம் இருந்ததாகவும், அதனால் தான் தன் வேலையை விட்டுவிட்டதாகவும் தெரிவித்துள்ளார் வினோத்.

அதைத் தொடர்ந்து தனக்கு வரவேண்டிய சம்பளப்பணமான 10,000 ரூபாயைத் தருமாறு பலமுறை கேட்டும் நிறுவன உரிமையாளர் பணத்தைத் தரவேயில்லை என்கிறார் வினோத்.

ஆகவே, அவருக்கு நஷ்டம் ஏற்படுத்துவதற்காக, கடைகளுக்கு வெளியே வைக்கப்பட்டுள்ள ஆடைகள் அடங்கிய பார்சல்களுக்கு தீவைக்க தான் முடிவு செய்ததாக தெரிவித்துள்ளார் வினோத்.

அதன்படி, ஒரு நாள் இரவு அந்தக் கட்டிடத்தின் ஆறாவது தளத்திலிருந்த அந்த ஆடை நிறுவனத்துக்குத் திரும்பிய வினோத், வெளியே வைக்கப்பட்டிருந்த ஆடைகள் அடங்கிய பார்சல்கள் மீது பெட்ரோலை ஊற்றி தீவைத்துள்ளார்.

தகவலறிந்து வந்த தீயணைப்புத்துறையினர் தீயை அணைக்க 14 மணி நேரம் போராடியிருக்கிறார்கள்.

என்றாலும், ஆறாவது தளத்திலிருந்த அனைத்துக் கடைகளும், ஐந்தாவது தளத்திலிருந்த சில கடைகளும் தீயால் சேதமடைந்துவிட்டுள்ளன.

தீயால் ஏற்பட்ட சேதம் சுமார் 24 கோடி ரூபாய் என கணக்கிடப்பட்டுள்ளது.

CCTVயின் உதவியால், தீவைத்தது வினோத் என கண்டறிந்த பொலிசார் அவரைத் தேடும்போது, அவர் ராஜஸ்தானுக்கும் பின் உத்தரப்பிரதேசத்துக்கும் தப்பிச் சென்றுவிட்டார்.

இந்நிலையில், திங்கட்கிழமையன்று வினோத் சூரத் திரும்பியுள்ளதாக பொலிசாருக்கு ரகசிய தகவல் கிடைக்க, அதிகாரிகள் அவரைக் கைது செய்துள்ளார்கள். அவரிடம் விசாரணை நடைபெற்றுவருகிறது.