உத்தரப் பிரதேசத்தில் இன்று 5ம் கட்டத் தேர்தல்: முக்கிய தொகுதிகளில் வாக்குப்பதிவு

உத்தரப் பிரதேசத்தில் இன்று நடைபெறும் 5ம் கட்ட தேர்தலில் அயோத்தி, ரேபெரலி, அமேதி உட்பட 61 தொகுதிகளுக்கு வாக்கு பதிவு நடைபெறவுள்ளது.

உத்தரப் பிரதேச மாநிலத்திற்கு 7 கட்டங்களாக சட்டப்பேரவை தேர்தல் நடைபெற்று வருகிறது. இதுவரை 4 கட்டத் தேர்தல் நடைபெற்று முடிந்த நிலையில், 12 மாவட்டங்களில் உள்ள 61 தொகுதிகளுக்கு இன்று வாக்குப்பதிவு நடைபெறவுள்ளது. இதில் 692 வாக்காளர்கள் களத்தில் உள்ளனர். இன்று காலை 7 மணிக்கு தொடங்கி மாலை 6 மணிவரை வாக்குப்பதிவு நடைபெறுகிறது.

மொத்தம் 2.24 கோடி வாக்காளர்கள் தங்களது வாக்கினை செலுத்த உள்ளனர். அமேதி, ரேபெரலி, அயோத்தி ஆகிய முக்கிய தொகுதிகளில் இன்று வாக்குப்பதிவு நடைபெறுகிறது. ஐந்தாம் கட்ட தேர்தலில் கௌசாம்பி மாவட்டத்தில் உள்ள சிரத்து சட்டமன்ற தொகுதியில் போட்டியிடும் துணை முதல்வர் கேசவ் பிரசாத் மவுரியா உள்ளிட்ட முக்கிய முகங்கள் உள்ளன. அவர் அப்னா தளம் (காமராவாடி) வேட்பாளர் பல்லவி படேலை எதிர்கொள்கிறார்.

அலகாபாத் மேற்குப் பகுதியைச் சேர்ந்த சித்தார்த் நாத் சிங், பட்டி (பிரதாப்கார்) பகுதியைச் சேர்ந்த ராஜேந்திர சிங் என்கிற மோதி சிங், அலகாபாத் தெற்கிலிருந்து நந்த கோபால் குப்தா நாடி மற்றும் மங்காபூரிலிருந்து (கோண்டா) ரமாபதி சாஸ்திரி ஆகியோர் அமைச்சர்களாக களத்தில் உள்ளனர். 1993 ஆம் ஆண்டு முதல் குண்டாவில் இருந்து எம்.எல்.ஏவாக இருக்கும் ரகுராஜ் பிரதாப் சிங் என்ற ரகுராஜ் பிரதாப் சிங், அவரது கட்சியான ஜன்சத்தா தளத்திலிருந்து மீண்டும்தேர்தலில் போட்டியிடுகிறார்.

காங்கிரஸ் சட்டமன்றக் கட்சித் தலைவர் ஆராதனா மிஸ்ரா மோனா பிரதாப்கரில் உள்ள ராம்பூர் காஸ் தொகுதியில் போட்டியிடுகிறார். 5ம் கட்ட வாக்குப்பதிவு நிறைவடையும் பட்சத்தில் உத்தரப் பிரதேசத்தில் மொத்தமுள்ள 403 தொகுதிகளில் 292 இடங்களுக்கு வாக்குப்பதிவு நிறைவுபெறும். மார்ச் 3 மற்றும் மார்ச் 7 ஆகிய தேதிகளில் 6 மற்றும்7ம் கட்ட தேர்தல் நடைபெறவுள்ளது.