சபாநாயகருக்கு எதிராக இந்த வாரம் பிரேரணை – ஐக்கிய மக்கள் சக்தி அறிவிப்பு.

சபாநாயகர் ஜகத் விக்கிரமரத்னவின் செயற்பாடுகள் மற்றும் நாடாளுமன்றத்தில் அவர் நடந்துகொள்ளும் முறைமை மீதான கடும் விமர்சனங்களின் அடிப்படையில், அவருக்கு எதிராக இந்த வாரம் நம்பிக்கையில்லாப் பிரேரணை ஒன்றைக் கொண்டுவரத் தீர்மானித்துள்ளோம் என்று ஐக்கிய மக்கள் சக்தியின் நாடாளுமன்ற உறுப்பினர் அஜித் பி. பெரேரா தெரிவித்தார்.

கொழும்பிலுள்ள ஐக்கிய மக்கள் சக்தி அலுவலகத்தில் நேற்று ஞாயிற்றுக்கிழமை நடைபெற்ற ஊடகவியலாளர் மாநாட்டில் கலந்துகொண்டு கருத்துத் தெரிவிக்கும்போதே அவர் மேற்கண்டவாறு குறிப்பிட்டார்.

அவர் மேலும் தெரிவிக்கையில்,

“நாடாளுமன்றத்தின் ஜனநாயகப் பண்புகளையும், நாடாளுமன்றப் பாரம்பரியங்களையும் சபாநாயகர் சீர்குலைக்கின்றார். எதிர்க்கட்சி நாடாளுமன்ற உறுப்பினர்களுக்குத் தங்களது கருத்துக்களை வெளிப்படுத்தத் தகுந்த வாய்ப்பு வழங்கப்படாமையும், அவர்களின் உரிமைகள் தொடர்ச்சியாக மீறப்பட்டு வருவதும் கவலைக்குரியது.

சபாநாயகர் பக்கசார்பின்றிச் செயற்படத் தவறி, அரசின் நலன்களுக்கு ஆதரவாக மட்டுமே செயற்பட்டு வருகின்றார்.

நாடாளுமன்றத்தில் நிறைவேற்றப்படும் சில சட்டமூலங்கள் மற்றும் விவாதங்களின் போது சபாநாயகர் நடந்துகொண்ட விதம் நாட்டின் நீதித்துறை மற்றும் சட்டத்தின் ஆட்சியைப் பாதிக்கும் வகையில் அமைந்துள்ளது. அவர் தனது பதவியின் கண்ணியத்தைக் காக்கத் தவறிவிட்டார்.

இதன் காரணமாகவே, இந்த வார நாடாளுமன்ற அமர்வில் சபாநாயகருக்கு எதிரான நம்பிக்கையில்லாப் பிரேரணையை முறைப்படி சமர்ப்பித்து, அதற்குரிய விவாதத்தைக் கோர எதிர்க்கட்சி நடவடிக்கை எடுத்துள்ளது.

நாட்டின் ஜனநாயகத்தையும் நாடாளுமன்றத்தின் உயர் அதிகாரத்தையும் பாதுகாப்பதற்காக எதிர்க்கட்சி தனது சட்ட மற்றும் அரசியல் போராட்டத்தைத் தொடர்ந்து முன்னெடுக்கும்.” – என்றார்.