சிங்கப்பூர் மக்களின் மனதை வென்ற தமிழர்!

யார் இந்த தர்மன் சண்முகரத்னம்?

இலங்கையை பூர்வீகமாகக் கொண்ட தமிழ் வம்சாவளி குடும்பத்தைச் சேர்ந்தவர் தர்மன் சண்முகரத்னம். இவரது தந்தை கனகரத்னம் சண்முகரத்னம் சிங்கப்பூரின் பிரலமான நோயியல் நிபுணராக இருந்தவர். சிங்கப்பூரில் நோயியலின் தந்தை,” என்றும் அவர் அழைக்கப்படுகிறார்.

மிகச் சிறந்த பொருளாதார வல்லுநரான தர்மன் சண்முகரத்னம், லண்டன் ஸ்கூல் ஆஃப் எகனாமிக்ஸில் பொருளாதாரத் துறையில் இளங்கலை அறிவியல் பட்டம் பெற்றவர். பின்னர் கேம்பிரிட்ஜ் பல்கலைக்கழகத்தின் வொல்ப்சன் கல்லூரியில் பொருளாதாரத்தில் முதுகலை தத்துவப் பட்டம் பெற்றார்.

கடந்த 2001ஆம் ஆண்டு சிங்கப்பூரின் ஜூரோங் தொகுதியில் இருந்து எம்பியாக தேர்ந்தெடுக்கப்பட்டார். சிங்கப்பூர் நாணய வாரியத்தின் தலைவர், பிரதமரின் ஆலோசகர், நிதியமைச்சர், கல்வி அமைச்சர், துணை பிரதமர் எனப் பல்வேறு பதவிகளை வகித்துள்ளார்.

இதுபோக, அனைத்துலக நாணய நிதியத்தில் நிதியமைச்சர்களின் உயர்மட்டக் கொள்கை மன்றத்தில் தலைமைப் பொறுப்பு, ஜி20 பிரதிநிதித்துவக் குழுவின் தலைமை பொறுப்பு, பொருளியல் மற்றும் நிதிநிலைத் தலைவர்களின் உலக மன்றம் போன்ற பல நிபுணத்துவ அமைப்புகளைத் தலைமையேற்று வழிநடத்தியுள்ளார்.

தேர்தல் வெற்றி குறித்து தனது முகநூலில் நன்றி தெரிவித்து பதிவிட்டுள்ள தர்மன் சண்முகரத்னம், “எனக்கும் எனது கொள்கைக்கும் செலுத்தப்பட்ட வாக்குகளை சிங்கப்பூரின் நம்பிக்கைக்கான வாக்குகளாக பார்க்கிறேன்.

சிங்கப்பூர்வாசிகளான நாம் எவ்வாறு ஒன்றாக முன்னேறலாம் மற்றும் ஒருவருக்கு ஒருவர் ஆதரவாக இருக்கலாம் என்பதற்கான நம்பிக்கையின் வாக்காக பார்க்கிறேன்.

பின்புலம், கல்வி ஆகியவற்றைக் கடந்து ஒருவரை மதிக்கக்கூடிய காலமாக எதிர்வரும் காலம் இருக்கும், இருக்க வேண்டும். நமது வெவ்வேறு நம்பிக்கைகள், கலாசாரங்களுக்கு இடையே நெருங்கிய தொடர்பு இருப்பதாக எதிர்காலம் அமைய வேண்டும்.

அப்போதுதான் நமது பன்முக கலாசார அடையாளத்தை ஆழமாக்க முடியும். ஒவ்வொரு தலைமுறையும் நமது தேசிய இருப்புகளிலிருந்து நம்பிக்கையையும் பயனையும் பெறும்விதமான எதிர்காலம் இருக்க வேண்டும்,” என்று குறிப்பிட்டுள்ளார்.

பட மூலாதாரம்,GETTY IMAGES

மேலும், ஒரு சில அரசியல்வாதிகளைப் போல் அவர் தனிப்பட்ட தாக்குதல்களில் ஈடுபடுவதைத் தவிர்த்தார். பண்பான அரசியல்வாதியை விரும்பும் வாக்காளர்களிடம் இது நல்ல தாக்கத்தை ஏற்படுத்தியது. அவர் பிரதமராக வேண்டும் என்ற ஆவல் சிங்கப்பூர்வாசிகள் பலர் மத்தியிலும் நிலவியது.

நான் பிரதமர் பதவிக்கு ஏற்றவன் அல்ல – தர்மன்

பட மூலாதாரம்,GETTY IMAGES

ஆனால், பிரதமர் பதவிக்கு ஏற்ற ஆள் தான் இல்லை என்று தர்மன் சண்முகரத்னம் தெரிவித்தார்.

கடந்த 2016ஆம் ஆண்டே இது தொடர்பாக செய்தியாளர்களிடம் பேசிய அவர், “நான் பிரதமருக்கான ஆள் இல்லை. நான் திட்டவட்டமாகச் சொல்கிறேன். அது நான் அல்ல. என்னைப் பற்றி எனக்குத் தெரியும், நான் என்ன செய்ய முடியும் என்று எனக்குத் தெரியும், அது நான் அல்ல.

நான் கொள்கை வகுப்பதில் சிறப்பாகச் செயல்படுவேன். எனது இளைய சகாக்களுக்கு அறிவுரை கூறுவதில் சிறப்பாக இருப்பேன். பிரதமருக்கு ஆதரவாக இருப்பேன். ஆனால், பிரதமராக இருப்பதில் அப்படியில்லை,” என்று தெரிவித்திருந்தார்.

சிங்கப்பூரில் சீனர்கள் அல்லாதவர்கள் அதிபர்களாக கடந்த காலங்களில் இருந்தபோதிலும், பொதுமக்களால் வாக்களிக்கப்பட்டு அதிபரான முதல் நபர் தர்மன் மட்டுமேயாகும்.

தேர்தலில் தர்மன் சண்முகரத்னத்தை எதிர்த்துப் போட்டியிட்ட இருவருமே சீனர்கள். தேர்தலுக்கு முன்னதாக, சமூக ஊடகங்களில் சிங்கப்பூருக்கு சீனத் தலைவர்களே தேவை என்பன போன்ற பதிவுகளைப் பார்க்க முடிந்தது.

தர்மன் சண்முகரத்தினத்தின் வெற்றியின் மூலம் இனவாதம் நிராகடிக்கப்பட்டிருப்பதை மக்கள் உணர்த்தியுள்ளதாகவும் முறையான பிரதிநிதித்துவத்திற்கான வெற்றியாகவும் அவரது ஆதரவாளர்கள் கொண்டாடுகின்றனர்.

– பிபிசி தமிழ்