யாழ்.சிறைச்சாலையிலிந்து வெளிவந்து 3 நாட்களில் உயிரிழந்த இளைஞன் : மரணத்தில் சந்தேகம்

யாழ்.சிறைச்சாலையில் இருந்து வெளிவந்து மூன்று நாட்களில் திடீரென உயிரிழந்த இளைஞனின் மரணம் சந்தேகத்திற்குரியது என அவரது உறவினர்கள் செய்த முறைப்பாட்டையடுத்து பொலிஸ் விசாரணைகள் ஆரம்பிக்கப்பட்டுள்ளன.

யாழ்ப்பாணம் அரசடி பகுதியைச் சேர்ந்த கணேஷ் நிஷாந்தன் என்ற 28 வயதுடைய இளைஞன் , கொள்ளைச் சம்பவம் தொடர்பில் பொலிஸாரால் கைது செய்யப்பட்டு நீதிமன்றில் முன்னிலைப்படுத்தி தடுப்புக் காவலில் வைக்கப்பட்டிருந்தார்.

அடுத்த வழக்கில் பிணையில் விடுவிக்கப்பட்ட நிலையில், வீடு திரும்பிய அவர், வீட்டில் இருந்தபோது, ​​திடீரென நோய்வாய்ப்பட்டு யாழ்.போதனா வைத்தியசாலையில் அனுமதிக்கப்பட்டுள்ளார்.

வைத்தியசாலையில் அனுமதிக்கப்பட்ட பின்னர் அவர் உயிரிழந்துள்ளதுடன், அவரது மரணத்தில் சந்தேகம் இருப்பதாக பெற்றோர் மற்றும் உறவினர்கள் செய்த முறைப்பாட்டின் அடிப்படையில் பொலிஸார் விசாரணைகளை ஆரம்பித்துள்ளனர்.

உயிரிழந்த இளைஞரின் மரணம் தொடர்பில் யாழ்.பொலிசார் நீதிமன்றத்திற்கு வழங்கிய அறிவித்தலின் அடிப்படையில் பிரேத பரிசோதனையை மேற்கொண்டு நீதிமன்றில் அறிக்கை சமர்ப்பிக்குமாறு நீதவான் பொலிஸாருக்கு உத்தரவிட்டுள்ளார்.