எரிவாயு தட்டுப்பாடு ஏற்படாது! – ஏப்ரல் இறுதி வரை கையிருப்பு உள்ளது என்று லிட்ரோ உறுதி.

இலங்கையில் சமையல் எரிவாயு விநியோகத்தை எவ்வித தடையுமின்றி முன்னெடுப்பதற்குத் தேவையான அனைத்து நடவடிக்கைகளும் எடுக்கப்பட்டுள்ளதாகவும், எதிர்வரும் ஏப்ரல் மாதம் இறுதி வரை போதியளவு கையிருப்பு உள்ளதாகவும் லிட்ரோ நிறுவனத்தின் தலைவர் சன்ன குணவர்தன தெரிவித்துள்ளார்.

எரிவாயு விநியோகம் தொடர்பாக அவர் வெளியிட்டுள்ள புதிய தகவல்கள் வருமாறு:-

நிலையான விநியோகச் சங்கிலி

நாட்டின் தேவைகளைப் பூர்த்தி செய்யும் வகையில், பிராந்தியத்திற்கு ஒவ்வொரு மூன்று நாட்களுக்கு ஒருமுறை எரிவாயு ஏற்றிய கப்பல் வந்தடைவதற்கு முறையான ஏற்பாடுகள் செய்யப்பட்டுள்ளன. இதன் மூலம் சந்தையில் நிலையான விநியோகம் உறுதிப்படுத்தப்படும் என்று அவர் சுட்டிக்காட்டினார்.

மாலைதீவில் மேலதிக சேமிப்பு

தற்போதைய நெருக்கடிச் சூழலைக் கருத்திற்கொண்டு, மேலதிக எரிவாயு இருப்புக்கள் மாலைதீவில் உள்ள சேமிப்பு நிலையங்களில் பாதுகாப்பாக வைக்கப்பட்டுள்ளன. அமெரிக்காவிலிருந்து 33 ஆயிரம் மெட்ரிக் தொன் எரிவாயுவை ஏற்றிய கப்பல் விரைவில் மாலைதீவை வந்தடையும் என எதிர்பார்க்கப்படுகின்றது.

புதிய கப்பல்களின் வருகை

இதனைத் தொடர்ந்து, அதே அளவு (33 ஆயிரம் மெட்ரிக் தொன்) எரிவாயுவைக் கொண்ட மற்றொரு கப்பல் ஏப்ரல் 20ஆம் திகதி இலங்கையை வந்தடையத் திட்டமிடப்பட்டுள்ளது.

தேசியத் தேவையைப் பூர்த்தி செய்வதற்கும், எவ்வித இடையூறுமின்றி விநியோகத்தைத் தொடர்வதற்கும் தேவையான நிதி மற்றும் இராஜதந்திர ஏற்பாடுகள் பூர்த்தி செய்யப்பட்டுள்ளதால், பொதுமக்கள் தேவையற்ற அச்சம் கொள்ளத் தேவையில்லை என்று லிட்ரோ தலைவர் சன்ன குணவர்தன மேலும் உறுதியளித்துள்ளார்.