22 ஆவது திருத்தத்தை நிறைவேற்ற சர்வஜன வாக்கெடுப்பு தேவையில்லை – உயர்நீதிமன்றத்தின் தீர்ப்பு இன்று சபாநாயகரால் சபையில் அறிவிப்பு.

அரசமைப்பின் 22 திருத்தச் சட்டமூலம் மற்றும் நீதித்துறை திருத்தச் சட்டமூலம் ஆகியவை அரசமைப்புக்கு உட்பட்டவை என உயர்நீதிமன்றம் தீர்ப்பளித்துள்ளது என்று சபாநாயகர் டாக்டர் ஜகத் விக்கிரமரத்ன இன்று நாடாளுமன்றத்தில் அறிவித்தார்.

அரசமைப்பின் 83 ஆவது பிரிவின் விதிகளின்படி, 22 ஆவது திருத்தச் சட்டமூலத்தின் சரத்துக்களோ அல்லது அதன் எந்தவொரு பகுதியோ சர்வஜன வாக்கெடுப்பு மூலம் ஒப்புதல் பெற வேண்டிய அவசியமில்லை என உயர்நீதிமன்றம் தீர்மானித்துள்ளது என்றும் அவர் தெரிவித்தார்.

அரசமைப்பின் 121 (1) பிரிவின் கீழ் உயர்நீதிமன்றத்தில் சவாலுக்கு உட்படுத்தப்பட்ட 22 ஆவது அரசமைப்புத் திருத்தம் மற்றும் நீதித்துறை திருத்தச் சட்டமூலம் தொடர்பான தீர்ப்பை தாம் பெற்றுள்ளதாகத் தெரிவித்த சபாநாயகர், உயர்நீதிமன்றத்தின் கட்டளைகளை வாசித்துக் காட்டினார்.

அதன்படி, 22 ஆவது அரசமைப்புத் திருத்தச் சட்டமூலத்தின் 2 ஆவது பிரிவில் உள்ள நிபந்தனையில் ’67 எய்தும் நாள்’ என்பதற்குப் பதிலாக ’67 வயதைப் பூர்த்தி செய்த நாள்’ என மாற்றப்பட வேண்டும் எனக் குறிப்பிடப்பட்டுள்ளது.

மேலும், 22 ஆவது திருத்தச் சட்டமூலத்தின் 2 ஆவது பிரிவில் இரண்டாவது நிபந்தனையாக, “இந்தச் சட்டம் அமுலுக்கு வரும் நாளில் பிரதம நீதியரசர் பதவியை வகிக்கும் எந்தவொரு நபருக்கும், முதலாவது நிபந்தனையில் குறிப்பிடப்பட்டுள்ள 6 ஆண்டுகள் கொண்ட பதவிக் கால வரம்பு பொருந்தாது.” எனவும் குறிப்பிடப்பட்டுள்ளது.

அத்துடன், நீதித்துறை திருத்தச் சட்டமூலத்தின் சரத்துக்கள் அரசமைப்புக்கு முரணானவை அல்ல என்றும், அதனை நாடாளுமன்றத்தில் சாதாரண பெரும்பான்மை மூலம் நிறைவேற்ற முடியும் என்றும் உயர்நீதிமன்றம் தீர்மானித்துள்ளது என்றும் சபாநாயகர் ஜகத் விக்கிரமரத்ன அறிவித்தார்.

நீதியரசர்கள், நீதிபதிகள் மற்றும் நீதிவான்களின் ஓய்வுபெறும் வயதை உயர்த்தும் நோக்கம் கொண்ட 22 ஆவது அரசமைப்புத் திருத்தச் சட்டமூலம், நீதித்துறை அமைச்சர் ஹர்ஷன நாணயக்காரவினால் கடந்த ஆகஸ்ட் 18 ஆம் திகதி நாடாளுமன்றத்தில் சமர்ப்பிக்கப்பட்டது.

இதனைத் தொடர்ந்து, இந்தச் சட்டமூலத்தின் அரசமைப்புத் தன்மையை சவாலுக்கு உட்படுத்தி பல்வேறு தரப்பினரால் உயர்நீதிமன்றத்தில் மனுக்கள் தாக்கல் செய்யப்பட்டன. அதன்படி மொத்தம் 67 மனுக்கள் தாக்கல் செய்யப்பட்டிருந்தன.

பிரதம நீதியரசர் ப்ரீதி பத்மன் சூரசேன தலைமையிலான, நீதியரசர்களான அச்சல வெங்கப்ப்புலி, அர்ஜுன ஒபேசேகர, சம்பத் அபேகோன் மற்றும் கிஹான் குலதுங்க ஆகிய 5 நீதியரசர்கள் கொண்ட உயர் நீதிமன்ற அமர்வு முன்னிலையில் இந்த மனுக்கள் பரிசீலிக்கப்பட்டன.

கடந்த செப்டெம்பர் 2 ஆம் திகதி விசாரணைகளை நிறைவு செய்த உயர்நீதிமன்ற அமர்வு, சட்டமூலத்தின் அரசமைப்புத் தன்மை குறித்த தங்களது தீர்மானத்தை சபாநாயகருக்கு அனுப்பி வைப்பதாக அறிவித்திருந்தது.

இதனிடையே, 22 ஆவது அரசமைப்புத் திருத்தச் சட்டமூலம் மீதான விவாதம் எதிர்வரும் 24 மற்றும் 25 ஆம் திகதிகளில் நடைபெறும் என்று நாடாளுமன்ற விவகாரக் குழுவினர் சமீபத்தில் தீர்மானித்துள்ளமை குறிப்பிடத்தக்கது.