அத்தியாவசியப் பொருள்களின் விலைகளும் உயரும் அபாயம்! – அமைச்சரின் கருத்தில் அம்பலம்.

நாட்டில் நிலவும் தற்போதைய பொருளாதாரச் சூழ்நிலைகள் மற்றும் உலகளாவிய சந்தை மாற்றங்களுக்கு ஏற்ப, அத்தியாவசியப் பொருள்களின் விலைகளில் ஏற்படக்கூடிய மாற்றங்கள் குறித்து அரசு உன்னிப்பாகக் கண்காணித்து வருகின்றது என்று வீடமைப்பு, கட்டுமானம் மற்றும் நீர் வழங்கல் அமைச்சர் சுசில் ரணசிங்க தெரிவித்தார்.

ஊடகங்களுக்கு இன்று கருத்துத் தெரிவிக்கும்போதே அவர் மேற்கண்டவாறு குறிப்பிட்டார்.

அவர் மேலும் தெரிவிக்கையில்,

“உலக சந்தையில் ஏற்படும் மசகு எண்ணெய் விலை மாற்றங்கள் மற்றும் உள்நாட்டுப் பொருளாதார நிலைவரங்களுக்கு அமையவே எரிபொருள் விலை திருத்தங்கள் மேற்கொள்ளப்படுகின்றன. இதன் காரணமாக ஏற்படும் போக்குவரத்து மற்றும் உற்பத்திச் செலவு அதிகரிப்பே சந்தையில் சில பொருள்களின் விலையேற்றத்துக்குக் காரணமாக அமைகின்றது.

விலை மாற்றங்களால் பொதுமக்கள் எதிர்கொள்ளும் நிதிச் சுமையையும் சிரமங்களையும் அரசு நன்கு உணர்ந்துள்ளது. பொதுமக்களுக்கு ஏற்படும் சுமையைக் கட்டுப்படுத்துவதற்கான தேவையான நடவடிக்கைகள் தொடர்ந்து முன்னெடுக்கப்படும்.

சந்தையில் செயற்கையான முறையில் பொருள்களின் விலைகளை உயர்த்துவது அல்லது செயற்கையான தட்டுப்பாடுகளை உருவாக்குவது போன்ற செயற்பாடுகளைத் தடுப்பதற்கும், நுகர்வோர் உரிமைகளைப் பாதுகாத்துச் சூழ்நிலையை மேலாண்மை செய்வதற்கும் உரிய பொறிமுறைகள் செயற்படுத்தப்பட்டு வருகின்றன.” – என்றார்.