மிரட்டும் ‘அர்னாப்’ சூறாவளி வடக்குக் கடலில் கடும் சீற்றம் மணிக்கு 100 கி.மீ வேகத்தில் சுழன்றடிக்கும் புயல் காற்று கடலில் உள்ள மீனவர்களை உடனே வெளியேற உத்தரவு.

‘அர்னாப்’ சூறாவளியாக வலுவடைந்தது தாழமுக்கம்; வட கடலில் காற்றின் வேகம் 100 கி.மீ. ஐத் தாண்டும் என எச்சரிக்கை!

வங்காள விரிகுடாவில் நிலவிய காற்றழுத்தத் தாழ்வு மண்டலம் தற்போது ‘அர்னாப்’ சூறாவளியாகப் பாரியளவில் வலுவடைந்துள்ளது என்று கடற்றொழில் மற்றும் நீரியல் வளங்கள் திணைக்களம் அறிவித்துள்ளது.

இது தொடர்பாகத் திணைக்களத்தின் பணிப்பாளர் நாயகம் சுசந்த கஹவத்த இன்று திங்கட்கிழமை மீன்பிடிச் சமூகத்தினருக்கு அவசர விசேட எச்சரிக்கை அறிவித்தலை விடுத்துள்ளார்.

இன்று வெளியிடப்பட்ட வானிலை முன்னறிவிப்பின்படி, குறித்த ‘அர்னாப்’ சூறாவளியானது இலங்கைத் தீவுக்கு வடக்குக்கும் கிழக்குக்கும் இடைப்பட்ட கடல் பகுதியில் நிலைகொண்டுள்ளது என்று தெரிவிக்கப்பட்டுள்ளது.

இந்தச் சூறாவளி வரும் நாள் ளில் மேலும் தீவிரமடைந்து, மேற்கு மற்றும் வடமேற்கு திசைகளை நோக்கி நகர்ந்து செல்லக்கூடும் என்று வானிலை அவதானிப்புகள் சுட்டிக்காட்டுகின்றன.

சூறாவளியின் தாக்கம் காரணமாக வடக்குக் கடற்பகுதிகளில் வீசும் காற்றின் வேகம் மணித்தியாலத்துக்கு 100 கிலோமீற்றர் வரை அல்லது அதற்கும் அதிகமாக அதிகரிக்கக்கூடும் என எச்சரிக்கப்பட்டுள்ளது.

இலங்கையைச் சூழவுள்ள அனைத்துக் கடற்பகுதிகளும் மிகவும் கொந்தளிப்பான நிலையிலும் சீற்றத்துடனும் காணப்படும் என்றும் கடற்றொழில் திணைக்களம் சுட்டிக்காட்டியுள்ளது.

வடக்கு கடற்பகுதிகளில் ஏற்கனவே மீன்பிடி நடவடிக்கைகளில் ஈடுபட்டுள்ள படகுகள் மற்றும் மீனவர்கள், சூறாவளியின் மையப்பகுதி மற்றும் அது நகரக்கூடிய பாதையிலிருந்து உடனடியாக இயன்றவரை விலகிப் பாதுகாப்பான இடங்களை நோக்கி நகருமாறு கேட்டுக்கொள்ளப்பட்டுள்ளனர்.

அத்துடன், கடற்றொழிலாளர்கள் அனைவரும் எதிர்வரும் நாள்களில் வெளியிடப்படும் வானிலை முன்னறிவிப்புகளைத் தொடர்ந்து மிக அவதானமாகக் கண்காணிப்பதுடன், திணைக்களமும் கடற்படையும் வழங்கும் பாதுகாப்பு வழிகாட்டுதல்களைக் கண்டிப்புடன் பின்பற்றிச் செயற்படுமாறு கடற்றொழில் மற்றும் நீரியல் வளங்கள் திணைக்களம் மேலும் கேட்டுக்கொண்டுள்ளது.