காங்கேசன்துறை துறைமுக அபிவிருத்தி: அமைச்சர் குழுவினர் விசேட கள ஆய்வு!

யாழ்ப்பாணம், காங்கேசன்துறை துறைமுகத்தின் எதிர்கால அபிவிருத்தி நடவடிக்கைகள் மற்றும் தற்போதைய முன்னேற்றங்கள் குறித்து ஆராய்வதற்காக உயர்மட்டக் குழுவினர் இன்று (20) விசேட விஜயம் ஒன்றினை மேற்கொண்டனர்.

துறைமுகங்கள் மற்றும் சிவில் விமான போக்குவரத்து அமைச்சர் அனுர கருணாதிலக, பிரதி அமைச்சர் ஜனித ருவான் கொடித்துவக்கு மற்றும் நாடாளுமன்ற உறுப்பினர் ரஜீவன் ஜெயசந்திரமூர்த்தி ஆகியோர் இன்று காலை துறைமுக வளாகத்திற்கு வருகை தந்து நிலைமைகளைப் பார்வையிட்டனர்.

இவ்விஜயத்தின் போது, துறைமுகத்தில் தற்போது முன்னெடுக்கப்பட்டு வரும் நிர்மாணப் பணிகள் மற்றும் எதிர்காலத்தில் திட்டமிடப்பட்டுள்ள பாரிய அபிவிருத்தித் திட்டங்கள் குறித்து அதிகாரிகளுடன் விரிவாகக் கலந்துரையாடப்பட்டது.

குறிப்பாக பின்வரும் விடயங்கள் குறித்து அதிக கவனம் செலுத்தப்பட்டது:

பயணிகள் கப்பல் சேவை: இந்தியாவுக்கும் இலங்கைக்குமிடையிலான பயணிகள் கப்பல் சேவையை மேலும் வலுப்படுத்துதல்.

வர்த்தக நடவடிக்கைகள்

* வட பிராந்தியத்தின் பொருளாதாரத்தை மேம்படுத்தும் வகையில் வர்த்தகக் கப்பல்களின் வருகையை அதிகரிப்பதற்கான உட்கட்டமைப்பு வசதிகள்.

தொழில்நுட்ப மேம்பாடு

* துறைமுகத்தின் ஆழத்தை அதிகரித்தல் மற்றும் நவீன களஞ்சிய வசதிகளை ஏற்படுத்துதல்.

இதேவேளை, காங்கேசன்துறை துறைமுகமானது பிராந்திய ரீதியாக முக்கியத்துவம் வாய்ந்த ஒரு கேந்திர நிலையமாக இருப்பதால், அதன் அபிவிருத்திப் பணிகளை விரைவுபடுத்துமாறு துறைமுக அதிகாரிகளுக்கு அமைச்சர் இதன்போது ஆலோசனை வழங்கினார்.

இக்குழுவினருடன் துறைமுக அதிகார சபையின் உயர் அதிகாரிகளும் கலந்துகொண்டிருந்தனர்.