மருத்துவர்களின் இடமாற்றத்தால் அவர்களின் பிள்ளைகளின் கல்வி பாதிக்கப்படவே கூடாது! – பிரதமர் ஹரிணி உத்தரவு.

இடமாற்றம் பெறும் அரச மருத்துவர்களின் பிள்ளைகளைப் பாடசாலைகளில் அனுமதிப்பதில் உள்ள நடைமுறைச் சிக்கல்கள் மற்றும் அவற்றுக்கான தீர்வுகள் குறித்த விசேட கலந்துரையாடல் ஒன்று பிரதமர் மற்றும் கல்வி அமைச்சர் கலாநிதி ஹரிணி அமரசூரிய தலைமையில் நாடாளுமன்றத்தில் நேற்று நடைபெற்றது.

சுகாதார அமைச்சர் நளிந்த ஜயதிஸ்ஸ மற்றும் மருத்துவ விசேட நிபுணர்கள் சங்கத்தின் பிரதிநிதிகள் கலந்துகொண்ட இந்தச் சந்திப்பில், மருத்துவர்களின் இடமாற்றங்களின் போது பிள்ளைகளின் கல்வி பாதிக்கப்படாத வகையில் புதிய வேலைத்திட்டங்களை முன்னெடுப்பது குறித்து விரிவாக ஆராயப்பட்டது.

இக்கலந்துரையாடலின் முக்கிய அம்சங்கள் வருமாறு:-

நடைமுறைத் தடைகள் குறித்து விளக்கம்

சுகாதார மற்றும் ஊடக அமைச்சினால் நடைமுறைப்படுத்தப்படும் மருத்துவர்களுக்கான இடமாற்றக் கொள்கையின் கீழ், பிள்ளைகளைப் புதிய பாடசாலைகளில் சேர்ப்பதில் எதிர்கொள்ளும் நிர்வாக ரீதியான தடைகள் குறித்து விசேட நிபுணர்கள் பிரதமருக்கு விளக்கமளித்தனர். இடமாற்றங்கள் மற்றும் ஏனைய நிர்வாகக் காரணங்களால் ஏற்படும் காலதாமதங்களைத் தவிர்ப்பதன் அவசியத்தை அவர்கள் இதன்போது வலியுறுத்தினர்.

துறைகளுக்கிடையிலான ஒருங்கிணைப்பு

கல்வி மற்றும் சுகாதாரத் துறைகளுக்கு இடையே சிறந்த ஒருங்கிணைப்பு இருப்பதன் மூலமே இப்பிரச்சினைக்கு முறையான தீர்வை வழங்க முடியும் என இரு தரப்பினரும் ஏற்றுக்கொண்டனர். தற்போதைய அனுமதி நடைமுறைகளை மீளாய்வு செய்து, இரு அமைச்சுக்களும் இணைந்து மிகவும் நடைமுறைச் சாத்தியமான மற்றும் திறமையான அமைப்பொன்றை உருவாக்க இதன்போது இணக்கம் காணப்பட்டது.

சுகாதார அமைச்சின் புதிய திட்டம்

அரச மருத்துவர்களின் பிள்ளைகளைப் பாடசாலைகளில் அனுமதிப்பதில் உள்ள சிக்கல்களைத் தீர்ப்பதற்காகச் சுகாதார அமைச்சு ஏற்கனவே ஒரு விசேட திட்டத்தை ஆரம்பித்துள்ளது. இடமாற்றங்களின் போது ஏற்படும் தடைகளைத் தவிர்ப்பதே இத்திட்டத்தின் பிரதான நோக்கமாகும்.

இந்தப் புதிய ஏற்பாடுகள் மற்றும் இணக்கப்பாடுகள் மூலம், நாட்டின் சுகாதார சேவையில் ஈடுபட்டுள்ள மருத்துவர்கள் இடமாற்றம் பெறும்போது, அவர்களது பிள்ளைகளின் கல்வி தொடர்பான கவலைகள் நீங்கும் என எதிர்பார்க்கப்படுகின்றது.