11 இலட்சம் வழக்குகள் தேக்கம்: தெரிவுக்குழுவை நியமிக்கத் தாமதம் ஏன்? – நாடாளுமன்றத்தில் சஜித் கேள்விக்கணை.

நீதிமன்றங்களில் 11 இலட்சம் வழக்குகள் தேங்கிக் காணப்படுவது குறித்து ஆராய்வதற்காகத் தாம் கோரிய தெரிவுக்குழுவைச் சபாநாயகர் இன்னும் நியமிக்காமல் இருப்பது ஏன் என்று எதிர்க்கட்சித் தலைவர் சஜித் பிரேமதாஸ நாடாளுமன்றத்தில் கேள்வி எழுப்பினார்.

நாடாளுமன்றத்தில் இன்று விசேட கூற்றொன்றை முன்வைத்து உரையாற்றும்போதே அவர் மேற்கண்டவாறு குறிப்பிட்டார்.

அவர் மேலும் உரையாற்றுகையில்,

“அரசமைப்பின் முதலாம் அத்தியாயத்தின் பிரகாரம் இறைமை மக்களுக்குரியது. ஆட்சித் தத்துவங்கள், அடிப்படை உரிமைகள் மற்றும் வாக்குரிமைகளை உள்ளடக்கிய மக்களின் இந்த உரிமைகள் சட்டவாக்கம், நிர்வாகம் மற்றும் நீதித்துறை ஊடாகவே பிரயோகிக்கப்படுகின்றன.

மக்களின் இறையாண்மையைப் பிரயோகிப்பதன் ஒரு பகுதியான நீதித்துறைச் செயற்பாடுகளில் 11 இலட்சம் வழக்குகள் குவிந்து காணப்படுவதாக நாம் எழுப்பிய கேள்விக்கு இதற்கு முன்னர் பதிலளிக்கப்பட்டுள்ளது. இந்தச் சூழலில் நீதித்துறைச் செயற்பாட்டின் செயற்றிறன், சுதந்திரம் மற்றும் வெளிப்படைத்தன்மை குறித்து ஆராயத் ‘தெரிவுக் குழு’ ஒன்று கோரப்பட்டுள்ளது.

இந்தத் தெரிவுக் குழுவைப் பெற்றுத் தருவது தொடர்பில் சபாநாயகரின் விருப்புரிமையைச் சவாலுக்குட்படுத்தப் போவதில்லை. எனினும், அரசமைப்பின் பிரகாரம் மக்களின் இறையாண்மையை மறுப்பதற்கான உரிமை சபாநாயகருக்குக் கிடையாது.

சபாநாயகராகத் தமக்குரிய விருப்புரிமைப்படி செயற்படச் சுதந்திரம் இருந்தாலும் அரசமைப்பை மீறுவதற்கான உரிமை யாருக்கும் இல்லை.” – என்றார்.