மட்டக்களப்பில் சுவர் இடிந்து விழுந்து குடும்பஸ்தர் பரிதாப மரணம்!

மட்டக்களப்பு, சந்திவெளிப் பகுதியில் வீடு ஒன்றின் கட்டுமானப் பணியில் ஈடுபட்டுக் கொண்டிருந்த போது கட்டடச் சுவர் ஒன்று இடிந்து விழுந்ததில் இரண்டு பிள்ளைகளின் தந்தை பரிதாபமாக உயிரிழந்துள்ளார்.

இந்தச் சம்பவத்தில் மற்றொருவர் படுகாயமடைந்துள்ளார் என்று சந்திவெளிப் பொலிஸார் தெரிவித்துள்ளனர்.

இன்று செவ்வாய்க்கிழமை காலை 8 மணியளவில் இந்தச் சம்பவச் இடம்பெற்றுள்ளது.

கிண்ணியடி வீதியைச் சேர்ந்த 48 வயதுடைய சாமித்தம்பி குமாரசிங்கம் எனும் மேசன் தொழிலாளியே சம்பவ இடத்திலேயே பரிதாபமாக உயிரிழந்துள்ளார்.

இந்தச் சம்பவத்தில் படுகாயமடைந்த மற்றொருவர் மேலதிக சிகிச்சைக்காக மட்டக்களப்பு போதனா வைத்தியசாலைக்கு மாற்றப்பட்டுள்ளார்.

சந்திவெளி பிரதான வீதியை அண்மித்த பகுதியில் புதிதாக நிர்மாணிக்கப்படும் வீடு ஒன்றில், இரண்டு மேசன் தொழிலாளர்களும் கொங்கிறீட் கொட்டுவதற்காகச் சட்டிங் (பலகை) அமைக்கும் பணியில் ஈடுபட்டிருந்தபோது எதிர்பாராத விதமாகச் சுவர் இடிந்து வீழ்ந்துள்ளது.

விபத்தில் படுகாயமடைந்த இருவரும் உடனடியாகச் சந்திவெளி வைத்தியசாலையில் அனுமதிக்கப்பட்ட நிலையில், கிண்ணியடியைச் சேர்ந்த சாமித்தம்பி குமாரசிங்கம் ஏற்கனவே உயிரிழந்துவிட்டார் என்று வைத்தியர்கள் தெரிவித்தனர்.

உயிரிழந்தவரின் சடலம் பிரேத பரிசோதனைக்காக வாழைச்சேனை ஆதார வைத்தியசாலையின் பிரேத அறையில் வைக்கப்பட்டுள்ளது.

இது தொடர்பான மேலதிக விசாரணைகளைச் சந்திவெளிப் பொலிஸார் மேற்கொண்டு வருகின்றனர்.