மும்பை அணி 10 ஓட்டங்கள் வித்தியாசத்தில் முதல் வெற்றியை பதிவு செய்தது.

சென்னை சேப்பாக்கம் மைதானத்தில் நடந்த ஐபிஎல் 5-வது லீக் ஆட்டத்தில் கொல்கத்தா நைட் ரைடர்ஸ் – மும்பை இந்தியன்ஸ் அணிகள் மோதின. டாஸ் வென்ற கொல்கத்தா நைட் ரைடர்ஸ் களத்தடுப்பை தேர்வு செய்தது.

அதன்படி மும்பை இந்தியன்ஸ் முதலில் துடுப்பாட்டம் செய்தது. ரோகித் சர்மா, குயின்டன் டி காக் ஆகியோர் தொடக்க வீரர்களாக களம் இறங்கினர்.

குயின்டன் டி காக் 2 ரன்னில் வெளியேறினார். ரோகித் சர்மா- சூர்யகுமார் யாதவ் ஜோடி சிறப்பான ஆட்டத்தை வெளிப்படுத்தியது.

சூர்யகுமார் யாதவ் அதிரடியாக விளையாடி 36 பந்தில் 7 பவுண்டரி, 2 சிக்சருடன் 56 ரன்கள் விளாசினர். அடுத்து வந்த இஷான் கிஷன் 1 ரன்னில் வெளியேறினார். ரோகித் சர்மா 43 ரன்னில் வெளியேறினார்.

அதன்பின் அந்த்ரே ரஸல் பந்துவீச்சில் மும்பை அணி திணறியது. ஹர்திக் பாண்ட்யா 15 ரன்னிலும், குருணால் பாண்ட்யா 15 ரன்னிலும், மார்கோ ஜென்சன் 0 ரன்னிலும், ராகுல் சாஹர் 8 ரன்னிலும் ஆட்டமிழந்தனர்.

இறுதியில், மும்பை இந்தியன்ஸ் 20 நிர்ணயிக்கப்பட்ட ஓவரில் 152 ரன்னில் ஆட்டமிழந்தது.

கொல்கத்தா அணியின் அந்த்ரே ரஸல் 4 ஓவரில் 15 ரன்கள் மட்டுமே விட்டுக்கொடுத்து 5 விக்கெட்டுகள் சாய்த்தார்.

153 ரன்கள் எடுத்தால் வெற்றி என்ற இலக்குடன் கொல்கத்தா அணி களமிறங்கியது. தொடக்க ஆட்டக்காரர்களாக நிதிஷ் ராணாவும், ஷுப்மான் கில்லும் இறங்கினர்.

இருவரும் இணைந்து முதல் விக்கெட்டுக்கு 72 ரன்கள் சேர்த்தனர். கில் 33 ரன்னில் அவுட்டானார். ராகுல் திரிபாதி 5 ரன்னிலும், மார்கன் 7 ரன்னிலும், ஷகிப் அல் ஹசன் 9 ரன்னிலும் ஆட்டமிழந்தனர்.

ஒருபுறம் விக்கெட் வீழ்ந்தாலும் நிதிஷ் ராணா பொறுப்புடன் ஆடி அரை சதமடித்து 57 ரன்னில் அவுட்டானார்.

கடைசி 4 ஓவரில் வெற்றிக்கு 30 ரன்கள் தேவைப்பட்டது. தினேஷ் கார்த்திக், அந்த்ரே ரஸல் ஆடினர். 17வது ஓவரில் 8 ரன்கள் கிடைத்தது. 18வது ஓவரில் 3 ரன்கள் மட்டுமே கிடைத்தது. 19வது ஓவரில் வெறும் 4 ரன்கள் மட்டுமே கிடைத்தது.

கடைசி ஓவரில் வெற்றிக்கு 15 ரன்கள் தேவைப்பட்டது. அந்த ஓவரில் போல்ட் 2 விக்கெட் வீழ்த்தினார்.

இறுதியில் கொல்கத்தா அணி 7 விக்கெட் இழப்புக்கு 142 ரன்கள் மட்டுமே எடுத்தது. இதன்மூலம் மும்பை அணி 10 ரன்கள் வித்தியாசத்தில் முதல் வெற்றியை பதிவு செய்தது.

மும்பை அணியின் ராகுல் சாஹர் 4 விக்கெட்டும், டிரெண்ட் போல்ட் 2 விக்கெட்டும் வீழ்த்தினர்.