நீரஜ் சோப்ரா.. டோக்யோ ஒலிம்பிக் ஈட்டி எறிதலில் சாதனை! தங்கப் பதக்கம் வென்றார் !

நீரஜ் சோப்ரா தங்கப் பதக்கம் வென்றதன் மூலம் பதக்கப்பட்டியலில் 66வது இடத்தில் இருந்த இந்தியா 46வது இடத்துக்கு முன்னேறியுள்ளது.

டோக்யோ ஒலிம்பிக் போட்டியில் இந்தியாவுக்காக முதல் தங்கப் பதக்கம் வென்றார் ஈட்டி எறிதல் வீரர் நீரஜ் சோப்ரா.

டோக்யோ ஒலிம்பிக் போட்டித் தொடரின் ஆடவர் ஈட்டி எறிதல் இறுதிச் சுற்றுப் போட்டியில் அசத்திய இந்திய வீரர் நீரஜ் சோப்ரா 87.58 மீட்டர் தூரத்துக்கு ஈட்டி வீசி இந்தியாவுக்காக முதல் தங்கப் பதக்கத்தை வென்று புதிய சரித்திரத்தை இன்று படைத்திருக்கிறார்.

சுதந்திரத்துக்கு பின்னர் தடகளத்தில் இந்தியர் ஒருவர் தங்கம் வெல்வது இதுவே முதல் முறையாகும். அதே போல தனி நபர் பிரிவில் தங்கப் பதக்கம் வென்ற இரண்டாவது இந்திய வீரர் என்ற பெருமையை நீரஜ் சோப்ரா படைத்திருக்கிறார். முன்னதாக அபினவ் பிந்த்ரா 2008 பீஜிங் ஒலிம்பிக்கில் துப்பாக்கிச்சுடுதல் பிரிவில் தங்கம் வென்றிருந்தது குறிப்பிடத்தக்கது.

இறுதிச் சுற்றில் ஜெர்மனி, பெலாரஸ், பாகிஸ்தான் நாட்டின் வீரர்கள் நீரஜ் சோப்ராவுக்கு கடுமையான சவால் அளித்தனர். நீரஜ் சோப்ரா முதல் சுற்றில் 87.03 மீட்டரும், இரண்டாம் சுற்றில் 87.58 மீட்டரும், மூன்றாம் சுற்றில் 76.79 மீட்டரும் ஈட்டி வீசினார்.

நீரஜ் சோப்ரா தகுதிச் சுற்று போட்டிகளில் 86.65 மீட்டர் வீசி நேரடியாக இறுதிச் சுற்று போட்டிக்கு தகுதி பெற்றிருந்தார் நீரஜ் சோப்ரா.

இறுதிப் போட்டியில் முதல் சுற்றில் இருந்தே நீரஜ் சோப்ரா முன்னிலை பெற்றிருந்தார்.

இரண்டாம் சுற்றில் 87.58 மீட்டர் வீசியதன் மூதல் முதல் சுற்றில் பெற்றிருந்த முன்னிலையை அவர் மேலும் அதிகப்படுத்தினார். நீரஜ் சோப்ராவுக்கு செக் குடியரசின் Vitezslav Vesely (85.44மீ) , ஜெரிமனியின் Julian Weber (85.30 மீ) ஆகியோர் சவாலாக இருந்தனர். பாகிஸ்தானின் நதீம் அதிகபட்சமாக 84.62 மீ வீசினார்.

நீரஜ் சோப்ரா தங்கப் பதக்கம் வென்றதன் மூலம் பதக்கப்பட்டியலில் 66வது இடத்தில் இருந்த இந்தியா 46வது இடத்துக்கு முன்னேறியுள்ளது.

2017ல் புவனேஸ்வரில் நடைபெற்ற ஆசிய விளையாட்டில் தங்கப் பதக்கம் வென்றிருந்தவர் நீரஜ் சோப்ரா.

“எப்போதுமே அனைவரும் பதக்கம் வெல்ல வேண்டும் என மட்டுமே சிந்திக்கிறார்கள். நான் விளையாடும்போது எனது ஆட்டத்தை சரியாக விளையாடி துல்லியமாக ஈட்டியை எறிய வேண்டும் என நினைப்பேன். நான் எனது நோக்கத்தை அடையும்போது அதில் கிடைக்கும் வெற்றிக்கான போனஸ்தான் பதக்கங்கள்” என்று பேட்டி ஒன்றில் குறிப்பிட்டிருந்தார் நீரஜ்.

 

Leave A Reply

Your email address will not be published.