மக்களவை தேர்தலை புறக்கணிப்பேன்; அதிமுக வேட்பாளர் அறிவிப்பால் பரபரப்பு

By தமிழினி On Apr 17, 2024

புதுச்சேரியில் பாஜகவும் காங்கிரஸும் மாறிமாறி வாக்களர்களுக்கு பணம் கொடுப்பதாக அம்மாநிலத்தின் அதிமுக வேட்பாளர் தமிழ்வேந்தன் குற்றஞ்சாட்டியுள்ளார்.

புதுச்சேரி மக்களவைத் தொகுதிக்கான வாக்குப்பதிவு நாளை மறுநாள் (ஏப்.19) நடைபெறுகிறது. இன்று மாலையுடன் பரப்புரை நிறைவடைதால் அரசியல் தலைவர்கள் தீவிர வாக்கு சேகரிப்பில் ஈடுபட்டுள்ளனர்.

இதனிடையே, புதுச்சேரி மக்களவைத் தொகுதிக்கு உட்பட்ட இடங்களில் பணம் பட்டுவாடா தாராளமாக நடப்பதாக குற்றஞ்சாட்டு எழுந்துள்ளது. இது தொடர்பாக செய்தியாளர்களை சந்தித்த புதுச்சேரி மக்களவைத் தொகுதியில் அதிமுக சார்பில் போட்டியிடும் தமிழ்வேந்தன், பாஜகவும் காங்கிரஸும் வாக்காளர்களுக்கு பணத்தை வாரி இறைப்பதாகக் கூறினார். பாஜகவினர் 500 ரூபாயும், காங்கிரஸ் கட்சியினர் 200 ரூபாயும் வாக்காளர்களுக்கு கொடுப்பதாக குற்றம்சாட்டினார்.

ஓட்டுக்கு பணம் கொடுப்பதால் இந்த தேர்தலில் நம்பிக்கை இல்லை என்றும் புதுச்சேரியில் தேர்தலை ரத்து செய்ய வேண்டும் என்றும் தமிழ்வேந்தன் வலியுறுத்தியுள்ளார். பாஜகவும், காங்கிரசும் ஓட்டுக்கு பணம் கொடுப்பதால் தேர்தலை புறக்கணிக்க உள்ளதாகவும் அவர் தெரிவித்தார்.